Broyta vardar íbúðir

Ætlanin er at broyta fimm vardar íbúðir, eina í Mylnutúni í Klaksvík og fýra í Blikagøtu í Runavík, til íbúðir til fólk við fjølbreki og tungum rørslutarni.

Eyðgunn Samuelsen, landsstýriskvinna í almannamálum, hevur spurt Fíggjarnevndina, um hetta ber til, tí verkætlanin er ikki nevnd í fíggjarlógini fyri 2015.

Peningur er í játtanini

Tað fer at kosta tvær milliónir krónur at gera tær fimm íbúðirnar. Pengarnir eru til í játtanini til bústovnar, sigur Almannamálaráðið.

Landsstýriskvinnan hevur biðið um ráðførslu við Fíggjarnevndina um, at íløgujáttanin í 2015 til bústovnar eisini kann umfata nýggja verkætlan um búpláss til fólk við tungum rørslutarni og fjølbreki.

Fíggjarnevndin hevur biðið Eyðgunn Samuelsen koma á fund fyrrapartin.