Samráðast um innkoyringarveg frá tunlinum

Landsstýrið er farið at samráðast við Tórshavnar kommunu, hvussu inn- og útkoyringarviðurskiftini skulu verða í sambandi við Eysturoyartunnilin.

Tað hevur Henrik Old, landsstýrismaður í samferðslumálum, upplýst fyri fíggjarnevndini. 

Fyribils verður mælt til at seta fýra milliónir krónur av til endamálið, men tá samráðingarnar um vegaloysnina eru lidnar, verður endalig upphædd sett á. 

Meirilutin í fíggjarnevndini sigur, at kostar vegurin meiri enn játtað, verður neyðugt við eykajáttan.

Raðfestir Hvalbiartunnil

Landsstýrismaðurin í samferðslumálum ætlar at raðfesta nýggjan Hvalbiartunnil, og meirilutin í fíggjarnevndini mælir til at játta fimm  milliónir krónur til fyrireikingarnar. Tað er m.a. at gera verkætlan, fáa lendi til vega og at gera seinastu jarðfrøðiligu kanningarnar.

Viðareiðistunnilin er komin so væl áleiðis, at hann verður liðugur í vár ella tíðliga í summar.

40 milliónir krónur vórðu fluttar til í ár, og tær seinastu umleið 40 milliónirnar verða játtaðar á fíggjarlógini næsta ár.