Føroyskt badminton sera góð úrslit í Íslandi

Fýra føroysk feløg hava kappast í badminton í Íslandi um vikuskiftið.

Føroysku leikararnir kláraðu seg sera væl í mest sum øllum aldursbólkunum.

Síðsta finalan varð spæld sunnukvøldið, og tá hon var liðug kundi føroyska legan fara heim aftur við eini rúgvu av heiðursmerkjum.

Tilsamans vunnu føroysku leikararnir tíggju gull og tíggju silvurheiðursmerkir. Hetta eru fimm fleiri heiðursmerkir enn Føroyar vunnu á somu leikum í fjør.

Serliga væl gekk tað hjá Sissal Thomsen og Jónasi Djurhuus, sum vunnu tríggjar gull av trimum møguligum.

Frálíkt úrslit

Erik Engelbrecht Thomsen, formaður í Badmintonsambandi Føroya fegnast um úrslitið, sum vísir, at tað er framgongd í ítróttini.

- Tað er gott at síggja, at okkara leikarar klára seg so væl, tí teir møttu sterkari íslendskari mótstøðu, sigur Erik Engelbrecht Thomsen.

Føroysku feløgini sum vóru umboðaði Íslandi vóru Havnar badmintonfelag, Klaksvíkar badmintonfelag, Miðvágs badmintonfelag og ÍF.