Smáur svartkjaftur skal verjast

Ungfiskurin skal nú verjast í svartkjaftafiskiskapinum í føroyskum sjógvi.

Høgni Hoydal, landsstýrismaður í fiskivinnumálum, lýsir reglur, sum skulu forða fyri, at ov nógvur smáur svartkjaftur verður fiskaður.

Nýggju reglurnar áseta hámark fyri ungfiski. Skiparin hevur skyldu at boða Vørn frá, um meira enn 50 prosent í hvørjum háli er svartkjaftur styttri enn 23 sentimetrar. 

Vørn kann síðani seta bráðfeingis veiðibann á leiðini, har ov nógvur ungfiskur er. 

Reglurnar eru galdandi fyri øll skip, sum fiska svartkjaft í føroyskum sjógvi, eisini tey útlendsku.

Hetta verður gjørt, tí bæði í fjør vár og aftur nú í vetur fáa skipini meira enn vanligt av smáum svartkjafti.

Landsstýrismaðurin heldur, at tað er í andsøgn við góða stovnsrøkt at fiska smáan svartkjaft, sum ikki er komin í gýtingaraldur.