Nógvur arbeiðsskaði í heilsurøktini

Av 168 fráboðanum um arbeiðsskaðar, sum Arbeiðseftirlitið fekk í 2014, er helvtin, 83, í bólkinum heilsa og røkt. Tað eru sjúkrahúsini og ellis- og røktarheimini.

Fiskiídnaðurin er nummar tvey í yvirlitinum við 42 arbeiðsskaðum í 2014. Hagtølini fyri 2015 eru ikki tøk enn.

SÍ EISINI Grafikkur: Her eru vandamestu arbeiðsplásini

Í byggivinnuni vóru 15 skaðar fráboðaðir í 2014, 11 í jarnídnaði, níggju í flutningsvinnu og lossing, fýra í skúlum og dagsstovnum, tríggir í handlum og á skrivstovum, og ein arbeiðsskaði var í landbúnaðinum, sambært tølunum hjá Arbeiðseftirlitinum.

Fleiri kvinnur enn menn fáa skaða av sínum arbeiði, 91 í 2014. 77 menn fingu skaða. Orsøkin er, at flestu skaðar henda á arbeiðsplássum, sum fáast við heilsu og røkt.

Í bólkinum Heilsa og røkt fingu 72 kvinnur og 11 menn skaða í 2014. Síðani 2008 hevur Arbeiðeftirlitið fingið fráboðanir um 804 skaðatilburðir á arbeiðsplássum í Føroyum.