196 útlendingar søkt um arbeiðsloyvi

196 útlendingar úr triðjalondum ella ES-londum, hava søkt um arbeiðsloyvi í Føroyum síðan 2013.

Tað sigur Hendrik Old landsstýrismaður í arbeiðsmarknaðarmálum í svari til fyrispurning frá Kára P Højgaard, løgtingsmanni hjá Nýggja Sjálvstýri.

Uppgerðin hjá landsstýrismanninum vísir, at 73 søktu um arbeiðsloyvi í 2013, 58 í 2014 og mett verður, at 65 útlendingar søktu um arbeiðisloyvi í Føroyum í 2015.

Útlendingar, ið eru giftir við føroyingum, og sum seta búgva í Føroyum, eiga at sleppa til arbeiðis skjótast gjørligt, sigur Hendrik Old eisini í svarinum til Kára P. Højgaard.

Men eru tey ikki úr Norðurlondum, skulu tey lúka krøvini um arbeiðs- og uppihaldsloyvi ella hava fingið familjusameiningsloyvi.

Tað er danska útlendingastýrið, sum viðger mál um arbeiðs- og uppihaldsloyvi í Føroyum.

Útlendingastovan veitir bara upplýsingar um málið til danir, sum síðani gera av, hvør sleppur til arbeiðis og ikki.

Málið hjá donsku myndugleikunum er, at familjusameining skal avgreiðast í mesta lagi tríggjar mánaðir eftir, at umsókn er latin inn. Tað verða tey eisini, sigur Hendrik Old í svari sinum til Kára P Højgaard.

Kári P. Højgaard vil eisini vita, nær væntast kann, at umsitingin og avgreiðsla av arbeiðs- og uppihaldsloyvi verður yvirtikið sum føroyskt sermál.

Svarið frá landsstýsimanninum er, at marknaðeftirlit og útlendingamál skulu yvirtakast samstundis sambært yvirtøkulógini.

Yvirtøkan av umsitingini og avgreiðsluni av arbeiðs- og uppihaldsloyvum verður sostatt ikki framd, fyrr enn alt málsøkið, útlendingamál- og marknaðeftirlit, verður yvirtikið, og hetta hevur víst seg at verið torført, tí tað hevur víst seg at vera ringt at finna eina loysn á spurninginum um Schengen.

Arbeitt veður tó framhaldandi við málinum, sigur Hendrik Old í svari sínum.