Svøríki: Kanna hóttan um yvirgang

Svenska trygdarløgreglan, Säpo, hevur kallað saman kreppubólkin, eftir at løgreglan hevur fingið upplýsingar um yvirgangshóttan móti landinum. Tað skrivar svenska blaðið, Aftonbladet, í morgun.

Sambært svenska blaðnum, Expressen, hevur Säpo fingið upplýsingar frá iraksku trygdartænastuni um, at IS-yvirgangsfólk hava ætlanir um at fremja yvirgangsálop í Stokkholmi.

Sambært Expressen, hava yvirgangsfólkini ætlanir um at søkja at sivilum málum í Stokkholmi. 

Talan skal vera um sjey ella átta persónar, sum longu eru í Svøríki. Fólk frá svensku trygdarløgregluni, Säpo, fóru ígjár til Irak.

- Júst nú arbeiða vit intensivt við at meta um upplýsingarnar, sum vit hava fingið, sigur Simon Bynert, kunningarfólk hjá trygdarløgregluni við blaðið. - Í løtuni savna vit saman upplýsingar og fráboðanir, og vit samstarva við svenskar og altjóða partnarar, sigur hann við Aftonbladet. 

Hann vil ikki siga, at nær løgreglan fekk upplýsingarnar, um nakar er handtikin ella um nakar er undir illgruna.

- Vit fáa javnan upplýsingar av hesa slagi. Stundum er tær meiri óvissar, - stundum minni, sigur Simon Bynert, kunningarfólk hjá svensku trygdarløgregluni.

Svenskar trygdardeildir og serligu deildirnar hjá løgregluni eru í øktaru tilbúgving, skrivar Expressen. 

Svenski innanríkismálaráðharrin, Anders Ygeman, vil ikki gera viðmerkingar til hóttanina. 

Hann vil heldur ikki siga, um  Säpo hevur kunnað innanríkisráðið um kanningararbeiðið, sum er í gongd í løtuni.