Ferðafólk skulu fáa gestavápnaprógv

Umhvørvisstovan eigur at undangóðkenna vápnatrygdarskeið í londum, haðani flestu ferðafólk koma til Føroya, so teimum ikki nýtist at søkja um gestavápnaprógv í Føroyum. Tað heldur Ferðavinnufelagið, sum hevur havt kunngerðina um vápnaprógv til hoyringar.

Sambært uppskotinum um kunngerð, skulu fólk, sum ikki hava fastan bústað í Føroyum, kunna søkja Umhvørvisstovuna um gestavápnaprógv, um tey hava gildugt vápnaprógv frá sínum heimlandi.

Skal vera galdandi í tríggjar mánaðir

Kravið er tó, at vápnatrygdarskeiðið, tey hava staðið, er á minst líka høgum stigi sum føroyska vápnatrygdarskeiðið. Eitt gestavápnaprógv er galdandi í tríggjar mánaðir.

Fyri at sleppa hesum fólkum undan at skulu søkja um gestavápnaprógv í Føroyum eigur Umhvørvisstovan at undangóðkenna útlendsk vápnatrygdarskeið, sum eru í londum, haðani vit fáa flestu ferðafólkini, sigur Ferðavinnufelagið.

Gestavápnaprógvið kann so brúkast, tá útlendska vápnatrygdarskeiðið ikki er undangóðkent í Føroyum.