Landsstýrismaðurin fær víða heimild

Landsstýrismaðurin í fiskivinnumálum fær víða heimild í kunngerðini um uppboðssølu, sum nú er til hoyringar.

Sambært uppskotinum um kunngerðina kann landsstýrismaðurin vraka øll boð, sum koma, og tá verður fiskurin boðin út av nýggjum.

Tvær ymiskar uppboðssølur

Landsstýrismaðurin kann eisini áseta ein minstaprís, áðrenn sølan byrjar, og hvussu nógv verður boðið út í senn. Ætlanin er at halda tvær uppboðssølur, eina opna og eina afturlatna.

Á opnu uppboðssøluni, sum Fiskamarknaðurin skipar fyri, verða seld 10.000 tons av svartkjafti, 9.000 tons av makreli, 4.000 tons av norðhavssild og 1.200 tons av botnfiski í russiska partinum av Barentshavinum.

SÍ EISINI Landsstýrismaðurin: Fleiri fáa nú høvið at bjóða

Vørn er uppboðssøluhaldari í afturlatnu uppboðssøluni. Har verða seld 10.000 tons av svartkjafti, 600 tons av botnfiski í norska partinum av Barentshavinum og 1.200 tons í russiska partinum.

Keyparin rindar tað, sum uppboðssølan kostar, hálvt annað prosent av tí, hann keypir fyri, í opna uppboðnum og 0,75 prosent í tí afturlatna. Gjaldast skal í hondina við hamarsslag.

Pengarnir fyri keypta fiskin verða kravdir so hvørt, fiskurin verður avreiddur. Men alt skal kortini vera goldið nýggjársaftan, sama, um fiskurin ikki er avreiddur tá.