Fuglafjarðar kommuna nýtt býráðshús

Tekniska deild hjá kommununi skal nú útvega tekningar og kostnaðarmeting. Nær býráðshúsið verður bygt, er ikki avgjørt.

Sambært uppskotinum hjá teimum fimm býráðslimunum skal nýtt býráðshús byggjast í miðbýnum, tá tíðin er komin til hetta, sum tað stendur í uppskotinum.

Vinnan hevur eisini byggiætlanir í Fuglafirði

P/f Sandgrevstur hevur fingið treytað loyvi at byggja goymslu millum Arbeiðsmannafelagshúsið og bygningin hjá Vónini, sum Framherji nú eigur.

Ein treyt hjá býráðnum er, at Arbeiðsmannafelagið sum granni verður hoyrt, og tey, sum missa útsýnið, verða kunnað, áðrenn byggiloyvið verður givið.

Býráðið heitir eisini á Sandgrevstur um ikki at byggja hægri enn neyðugt. Býráðið í Fuglafirði hevur eisini samtykt at geva P/f Vónini treytað byggiloyvi til trolvirki á Enni.

Byggiloyvið verður skrivað, tá kommunan fær tekningar og verkætlan frá Vónini, sum Tekniska deild hjá býráðnum kann góðtaka.