Fiskidagar: Sonja atkvøður fyri samgongutilmælinum

Samgongan kann rokna við atkvøðuni hjá Sonju Jógvansdóttur, uttanflokkatingkvinnu, tá atkvøtt verður um fiskidagarnar í næstu viku. 

Sonja Jógvansdóttir sigur, at hon fer at atkvøða fyri tí, sum samgongan í Vinnunevndini kemur við.

Samgongan hevur brúk fyri atkvøðuni hjá Sonju Jógvansdóttur, tí í samgonguni eru bara 16 fólk av 33 tingfólkum. 

Vinnunevndin fer at leggja álit til uppskotið um fiskidagar fyri tingið í morgin, og málið kemur til 2. viðgerð mánadagin.

Roynir breiða semju

Bjarni Hammer, formaður í vinnunevndini, sigur, at hann roynir at fáa eina breiða semju í nevndini, nú álitið verður skrivað.

Hesa vikuna hava feløg, einstaklingar og stovnar verið í vinnunevndini og sagt sína hugsan um málið.

Sambært uppskotinum hjá Høgna Hoydal, landsstýrismanni, verða fiskidagarnir í fyrstu atløgu skerdir 30 prosent, men 15 prosent verða lutað útaftur til skip, sum hava brúkt sínar fiskidagar.

Atkvøtt verður í málinum við 2. viðgerð mánadagin. Triðja viðgerð verður mikudagin 17. august.

Nýggja fiskiárið byrjar 1. september.