Anni á Hædd er flutt í starv á Umhvørvisstovuni

Anni á Hædd er ikki longur deildarstjóri á deildini fyri Náttúru- og orkumál í Heilsu- og Innlendismálaráðnum. Hon hevur skrivað undir eina avtalu við aðalráðið, sum merkir, at hon verður flutt í eitt starv á Umhvørvisstovuni.

Tað sæst í eini avtalu, sum Turid Arge, aðalstjóri og Anni á Hædd hava undirskrivað, og sum Kringvarpið hevur fingið innlit í.

Sambært avtaluni, dagfest og undirskrivað 26.august, verður Anni á Hædd frá 1.september at rokna fulltrúi á Umhvørvisstovuni. Enn er ikki útgreinað, hvørjar arbeiðsuppgávur hennara verða har. Tað skal gerast í samráð við leiðsluna á Umhvørvisstovuni.

Í brævi til lønardeildina í Fíggjarmálaráðnum skrivar aðalstjórin í Heilsu- og Innlendismálaráðnum, at Anni á Hædd hevur umsitið náttúru- og umhvørvisøkið í nógv ár, fyrst í Innlendismálaráðnum og síðani í Fiskimálaráðnum, og tí má hon metast at vera serfrøðingur á økinum. Víðari vísir Turid Arge á, at samgongan hevur valt at raðfesta umhvørvisøkið sera høgt, og tí verður nógv arbeiði at fremja á økinum restina av hesum valskeiðnum.

Fíggjarmálaráðið hevur góðkent, at Anni á Hædd fær eina serfrøðinga-viðbót í sínum nýggja starvi á Umhvørvisstovuni.

Anni á Hædd varðveitir sína deildarstjóraløn, tað er 37.lønarflokkur í lønartalvuni hjá Tænastumannafelagnum, næsta hálva árið. Tá verður hon lønt eftir sáttmálanum hjá Búskapar- og Løgfrøðingafelagnum, har hon fær endalønina hjá fulltrúum, umframt 4.000 krónur afturat um mánaðin í serfrøðingaviðbót.

"Vit hava mist álitið á tær"

Við avtaluni millum Heilsu- og Innlendismálaráðið og Anni á Hædd endar ein hørð træta partanna millum.

18. juli fekk Anni á Hædd ætlanarskriv um uppsøgn. Heilsu- og Innlendismálaráðið umhugsaði at siga hana úr starvi, tí hon sum deildarstjóri tók avgerð um at senda góðkenningarskriv viðvíkjandi broytingini í byggisamtyktini fyri eystara havnaøki í Havn, uttan at landsstýriskvinnan hevði góðkent skrivið.

Sambært ætlanarskrivinum varð tað gjørt, hóast bæði landsstýriskvinnan og aðalstjórin í fleiri førum klárt og týðiliga høvdu givið bot um, at skrivið ikki skuldi sendast, fyrr enn landsstýriskvinnan hevði góðkent tað. Avgerðin hjá Anni á Hædd hevði, sambært ætlanarskrivinum, sett landsstýriskvinnuna í eina sera trupla støðu politiskt.

Aðalstjórin leggur ikki fingrarnar ímillum í ætlanarskrivinum, dagfest 18. juli:

"Tað, at tú soleiðis tekur avgerð beint ímóti boðum frá landsstýriskvinnuni, er so grovt ólýdni og álitisbrot, at landsstýriskvinnan og undirritaða hava mist alt álit á tær. Brotið er so mikið grovt, at tú helst kundi verið burturvíst, men vit umhugsa eina vanliga uppsøgn."

Sambært skjølunum í málinum varð møguleikin fyri at seta í verk eina tænastumannakanning eisini umrøddur í Heilsu- og Innlendismálaráðnum. Tað bleiv kortini av ongum.

Málið endaði fyrradagin, tá aðalráðið og nú fyrrverandi deildarstjórin skrivaðu undir avtalu, ið merkir, at Anni á Hædd verður flutt í starv á Umhvørvisstovuni.