Fiskimenn í Íslandi í óvissu

Fiskimenn eru nú eisini komnir upp í kjakið í Íslandi um uppboðssølu. Formenninir í felagnum hjá fiskimonnum og í felagnum hjá yvirmonnum mæla staðiliga frá at selja fiskirættindi á uppboðssølu í Íslandi.

Verða fiskirættindi seld á uppboði, kunnu fiskimenn ongantíð vita, nær teirra skip sleppur at fiska. Teir fara at liva í støðugari óvissu og kunnu missa hýruna frá degi til dags.

Hetta verður ikki bara ringt fyri fiskimenninar, men eisini fyri onnur og fyri tjóðina sum heild, siga fiskimenn. Harafturat fer uppboðssølan at gera, at nøkur fá reiðarí hava øll fiskiloyvini.

Nógv kjak hevur verið í Íslandi um royndirnar av uppboðssølunum í Føroyum. Summi halda, at íslendingar eiga at gera sum føroyingar, men onnur ávara harðliga móti tí.