Nú verður Arbeiðseftirlitið sjálvstøðugur stovnur

Lógaruppskotið, um at Arbeiðseftirlitið skal verða sjálvstøðugur stovnur undir Samferðslumálaráðnum, er nú komið í tingið, og tað kemur til fyrstu viðgerð seinni í mánaðinum.

Brunaeftirlitið skal í framtíðini eisini vera partur av Arbeiðseftirlitinum. Brunaeftirlitið er í løtuni deild hjá Vørn, sum er stovnur undir Fiskimálaráðnum. 

Seinastu árini hevur Arbeiðseftirlitið verið partur av Heilsufrøðiligu Starvsstovuni, sum Uttanríkis- og vinnumálaráðið umsitur. 

Bindingin strikað

Sambært uppskotinum, sum Henrik Old, landsstýrismaður, hevur lagt fram, verður lógarfesta bindingin millum Heilsufrøðiligu Starvsstovuna og Arbeiðseftirlitið strikað, soleiðis at Samferðslumálaráðið kann skipa Arbeiðseftirlitið sum sjálvstøðugan stovn.

Síðani landsstýrið varð skipað í 2015, hava bæði Arbeiðseftirlitið og Brunaeftirlitið tó víst til landsstýrismannin í samferðslumálum.

Við broytingini verða umsitingin av Arbeiðseftirlitinum og Brunaeftirlitinum løgd undir Samferðslumálaráðið. 

Hevur ikki verið raðfest

Henrik Old, landsstýrismaður, sigur í viðmerkingunum til uppskotið, at játtanin til Arbeiðseftirlitið hevur verið niðurraðfest seinnu árini, samstundis sum virksemið í samfelagnum er vaksið. 

Landsstýrið hevur tí hækkað játtanina til Arbeiðseftirlitið, og fer at raðfesta arbeiðsumhvørvið, verður sagt í viðmerkingunum. 

Uppskotið um at skipa Arbeiðseftirlitið sum sjálvstøðugan stovn undir Samferðslumálaráðnum hevur ikki verið til hoyringar. Málið fær fyrstu viðgerð í tinginum 23. februar.