Søkja grunnar um stuðul

2,3 milliónir krónur eru játtaðar til at listprýða nýggja H-bygningin á Landssjúkrahúsinum. Restin av peninginum skal koma úr grunnum

Ein arbeiðsbólkur, ið er settur at fáa list til vega til nýggja H-bygningin á Landssjúkrahúsinum, fer nú saman við listafólkunum at søkja ymsar grunnar um stuðul

Sigmar Bláberg

Bjarni Mohr

24.02.2017 - 14:52

Listabólkurin, sum er settur at fáa list til vega til nýggja H-bygningin á Landssjúkrahúsinum, fer nú saman við listafólkunum at søkja ymsar grunnar um stuðul til verkætlanina.

Í gjár varð avdúkað, at 2,3 milliónir krónur eru settar av til list til nýggja bygningin, og at trý listafólk skulu standa fyri høvuðslistini, meðan listaverk skulu keypast frá tveimum øðrum.

Trý listafólk gera høvuðsarbeiðið

Talan er um eina verkætlan sum varir í fýra ár. Ta tíðina, tað tekur at byggja nýggja sjúkrahúsbygningin á Landssjúkrahúsinum.

Tey trý listafólkini, sum skulu standa fyri høvuðslistini, eru Sigrun Gunnarsdóttir av Eiði, Guðrið Poulsen úr Havn og Havier Tapiana úr Chile, sum býr í Keypmannahavn.

Haraftrat skulu listaverk keypast frá Rannvu Kunoy og Brandi Patursson.