Kanning: Ung bíða leingi eftir hjálp

Tá tey so endiliga fáa hjálpina, krevst størri viðgerð, og sannlíkindini fyri at venda aftur til ein vanligan gerandisdag eru nógv minni. Tað sigur ein norðurlendsk kanning.

Kanningar siga eisini, at fjórða hvørt fólk í aldrinum 18 til 29 ár sigur seg hava upplivað ringa sálarheilsu.

Og fimta hvørt fólk sigur, at tey, áðrenn tey fyltu 14 ár, høvdu sálarligar trupulleikar, sum gjørdi lív teirra trupult.

Luttekur á toppfundi í Oslo

Tað segði Sirið Stenberg, landsstýriskvinna, í røðu, sum hon helt á norðurlendskum toppfundi um sálarheilsu í Oslo.

Hon greiddi eisini fundinum frá arbeiðsbólkinum, sum er settur at gera heildarætlan um psykiatri í Føroyum. Bólkurin hevur havt sín fyrsta fund. 11 fólk eru í bólkinum.

Sirið Stenberg sigur, at málið við heildarætlanini er at tryggja, at øll við sálarsjúku fáa eina javnbjóðis, dygdargóða og trygga tænastu so tætt at gerandislívinum sum til ber.