Sleppa ikki undan læknaváttanum

Lógarbroytingin, sum annars var til hoyringar, er ikki við, nú Almannamálaráðið hevur latið Løgtingsskrivstovuni síni uppskot í hesari tingsetuni.

Eyðgunn Samulsen, landsstýriskvinna, sigur, at hon hevur ikki slept ætlanini um at linka kravið læknaváttan á privata arbeiðsmarknaðinum. Men nær, lógarbroytingin kemur í tingið, veit hon ikki nú.

SÍ EISINI Mæla frá at linka krøvini til læknaváttanir

Ætlanin var at linka kravið um læknaváttan. Skotið varð upp, at í málum, har dagpeningur í mesta lagi verður latin fyri eina arbeiðsviku, skulu læknaváttanir ikki útvegast.

Tó skal læknaváttan útvegast, um arbeiðsgevarin biður um tað, tá umsøkjarin seinasta 12 mánaða skeiðið hevur havt í minsta lagi trý fráveruskeið og hevur fingið dagpening fyri hesi skeiðini.

Lógarbroytingin kemur ikki nú

Ikki er greitt enn, hvussu hendan reglan skal umsitast. Tí kemur lógarbroytingin ikki nú, sigur landsstýriskvinnan. Arbeiðsgevarum dámdi lítið ætlaðu lógarbroytingina.

Tað eigur altíð at vera eitt krav fyri at fáa dagpening, at lækni hevur váttað sjúku. Tað er lítið at ivast í, at linkaða kravið um læknaváttan hevur við sær fleiri dagpengar.

Tað rakar hvørja ferð arbeiðsgevaran, sum fær rokning frá dagpeningaskipanini fyri fyrsta og annan sjúkradagin, segði Arbeiðsgevarafelagið í sínum hoyringarsvari.