Mugu fyrireika seg til sveiggj

Tað skulu peningastovnarnir í Føroyum gera 1. januar 2018. Mælt verður til, at teir seta av eitt prosent av útlánunum til ein sonevndan "puffara" at standa í móti við.

Føroyski búskapurin byggir í høvuðsheitum á fiskivinnu og alivinnu og er tí viðbrekin. Váðaráðið sigur, at hetta er ikki nakað hart krav.

Teir peningastovnar, sum ikki halda kravið, missa ikki rættin at reka peningastovn, men fáa onnur krøv millum annað viðvíkjandi bonusi og vinningsbýti.

Peningur setast av til at standa ímóti við

Váðaráðið heldur, at sum frá líður skulu peningastovnarnir seta av fleiri pengar at standa í móti við. Hetta verður gjørt í samráði við føroyskar myndugleikar.

Danska stjórnin hevur nú tríggjar mánaðir til at gera, sum Váðaráðið mælir til, ella koma við frágreiðing um, hví stjórnin ikki gjørdi, sum mælt varð henni til.

Váðaráðið sigur, at peningastovnarnir í Føroyum eru so mikið væl fyri, at teir tola kravið um eitt prosent. Endamálið er at styrkja fíggjarliga støðufestið í Føroyum.