Norðurkorea ávarar USA ímóti at leypa á

Norðurkorea hevur ávarað USA um ikki at vera ágangandi og sigur landið vera til reiðar at svara aftur við kjarnorkuvápnum.

Viðmerkingarnar eru komnar í samband við hátíðarhaldið fyri Kim Il Sung, fyrsta forseta landsins, nú 105 ár eru liðin síðani hann varð føddur.

Í hesum sambandi var stór hernaðar-skrúðgonga í høvuðsstaðnum Pyongyang, har Kim Jong-un, forseti, var til steðar, og gitt verður at høvið eisini fer at vera brúkt til at gera enn eina kjarnorku-royndarspreinging.

Millum vápnini á hernaðar-framsýningini var ein langsberandi rakett, sum kann skjótast út frá einum kavbáti.

- Norðurkorea er til reiðar til eitt altumfatandi kríggj, verður landið álopið, sigur Choe Ryong-hae, ið verður hildin at vera næsti maður Kim Jong-un, forseta.

Amerikanskur flogberi á veg

Norðurkorea hevur framt fimm royndarspreingingar við kjarnorkuvápnum og hevur roynt eina røð av rakettum.

Norðurkorea var á dagsskránni á fundinum millum kinesiska og amerikanska forsetan í Florida herfyri. Donald Trump, forseti, heldur, at Kina ger alt ov lítið fyri at avmarka ta hóttan, sum USA heldur, at Norðurkorea er.

- Um Kina vil hjálpa til, so ongantíð betur, hevur Donald Trump sagt, men um Kina ikki ger tað, loysa vit trupulleikan uttan teirra hjálp, sigur amerikanski forsetin.

Amerikanski varaforsetin Mike Pence er á veg til Suðurkorea og onnur lond í Asia, og amerikanski flogberin "Carl Vinson" er á veg til koreansku hálvoynna saman við eini flotadeild.

- Vit hava sent ein sterkan herflota avstað, sigur Donald Trump, forseti, í samrøðu við Fox Business Network.

---