Nýggj breyt til miðnámsskúlanæmingar

Landsstýriskvinnan í mentamálum bað herfyri Miðnámsskúlan í Hovi um at kanna, um undirtøka var fyri at stovna eina búskaparbreyt. Nú eru umsóknirnar komnar inn.

Grundarlag er fyri at stovna eina búskaparbreyt á skúlanum. Miðnámsskúlin í Suðuroy hevur í dag náttúrubreyt, hugbreyt og FHS-yrkisnám. Og í heyst byrjar eisini búskaparbreyt á skúlanum.

Kemur væl við í oynni

- Tað hevur alstóran týdning, at vit halda fram at menna útbúgvingartilboð um alt landið. Samgongan hevur sett sær sum mál at styrkja fólkavøksturin og fáa eitt javnari kynsbýti.

Ikki minst er hetta neyðugt í Suðroynni, har avbjóðingarnar eru størri enn í restini av landinum, sigur Rigmor Dam, landsstýriskvinna í mentamálum, í tíðindaskrivi.

Rigmor Dam, landsstýriskvinna, sigur, at góð undirvísingartilboð fáa tey ungu at støðast og kveikja nýggjar vinnumøguleikar.