Innflutningur verður nú sektaður

Bara Apoteksverkið hevur loyvi til at innflyta heilivág í Føroyum. Men posteftirlitið hjá TAKS finnur so at siga hvønn dag heilivág, sum fólk hava keypt á netinum.

Frá hósdegnum í næstu viku fáa hesi fólk sekt fyri at innflyta heilivág, upplýsir TAKS. TAKS upplýsir ikki, hvussu stór sektin er. Tað er eisini galdandi fyri tað, sum verður brúkt til elektroniskar sigarettir.

Apoteksverkið skal hjálpa TAKS

Kemur eftirlitið hjá TAKS fram á vøru, sum TAKS heldur vera heilivág, verður Apoteksverkið boðsent fyri at staðfesta, um so er. 

Er talan um heilivág, verður sendingin latin løgregluni, sum síðani setir seg í samband við móttakaran og avgreiðir málið við hann. TAKS kunnar móttakaran um hetta fyrst.

Er onnur vøra umframt heilivágin í sendingini, verður hon útflýggjað, tá løgreglan er liðug at viðgera málið. Heilivágurin verður fyribeindur.