Útivið hálva milliard í vinnuni

Umboð fyri danska forsætismálaráðið og hollendsku sendistovuna hava verið á fundi um føroysku fiskivinnunýskipanina. Danmark fer ikki at blanda seg í føroysk mál, hóast danski forsætisráðharrin er samdur við støðu Hollands í málinum um fiskivinnunýskipanina.

Tað vísir skjal, sum Kringvarpið hevur fingið innlit í. Hollendska sendistovan sendi fyrst í juni danska forsætismálaráðnum teldupost, har sagt var, at hollendska stjórnin var sera ørkymla um føroysku ætlaninar um fiskivinnunýskipan.

20. juni var fundur millum donsk embætisfólk og hollendska sendiharran. Marjun Hanusardóttir, løgmansstjóri, varð eftir fundin kunnað um innihaldið á fundinum.

Serliga eitt stórt felag

Í telefonnotati eftir samrøðuna millum løgmansstjóran og eitt danskt embætisfólk, skrivar Marjun Hanusardóttir, løgmansstjóri, at:

"Boðskapurin hjá hollendska sendiharranum var, at hollendska vinnan og almennir mynduleikar eru sera illa við av uppskotinum hjá landsstýrisnum at seta forboð fyri útlendskum kapitali í fiskivinnuni."

Serliga er tað eitt stórt hollendskt felag, sum hevur gjørt íløgur fyri áleið 450 milliónir krónir í 18 skip og eigur eitt uppsjóvarvirki. Hollendski sendiharrin staðfesti, at Føroyar hava heimild at seta slíkar reglur í gildi, men tað kemur sera illa við hjá teimum.

Ó-føroyskur arbeiðsháttur

Hesar reglur eru ikki í samljóði við evrpeiska mátan at arbeiða uppá, har holdningurin er, at opna meira upp fyri samhandli og samstarvi.

Tað kemur eisini fram í telefonnotatinum hjá løgmansstjóranum, at sendiharrin heldur, at hetta kann koma at ávirka framtíðar fiskivinnusamráðingar við ES.

Holland er jú partur av ES-samráðingum. Og at seta slíkar reglur í gildi fer ikki at økja um good will-kapitalin hjá Føroyum, stendur í notatinum.

Danmark kann ikki blanda seg

Sambært notatinum, so hava embætisfólkini í forsætismálaráðnum gjørt hollendska sendiharranum greitt, at Danmark ikki kann blanda seg í føroysk mál, hóast danski forsætismálaráðharrin var samdur við støðu Hollands í hesum máli.

Kringvarpið hevur eisini biðið um innlit í samskifti við íslendska uttanríkisráðharran og føroyska uttanríkisráðið um fiskivinnunýskipanina. Føroyska uttanríkisráðið vil ikki lata innlit í samskiftið við íslendska uttanríkisráðharran

Uttanríkisráðið vísir til, at talan er um uttanríkispolitisk áhugamál fyri Føroyar. Íslendsku mynduleikarnir hava eisini heitt á føroyska uttanríkisráðið, um ikki at lata alment innlit í samskiftið.