Verjumálaráðharrin í Svøríki heldur fram

Svenska stjórnin er umskipað.

Fyri løtu síðani kunngjørdi svenski forsætisráðharrin, Stefan Løfven, at fleiri ráðharrar fáa nýggjar sessir, og at aðrir fara úr stjórnini.

Tveir ráðharrar fara úr stjórnini, og tveir nýggir ráðharrar eru tilnevndir.

Triði ráðharrin, sum andstøðan ætlaði at reisa misálit móti, var Peter Hultqvist, verjumálaráðharri, men hann verður sitandi, tí forsætisráðharrin heldur ikki, at grundarlag er fyri atfinningum móti verjumálaráðharranum.

Stefan Løfven segði á tíðindafundi í Stockholm, at nú stendur til tað til andstøðuna, sum hevur meiriluta í ríkisdegnum, um hon fer at reisa misálit á Peter Hultqvist.

Reisir andstøðan misálit, má hon taka avleiðingarnar av tí, sigur forsætisráðharrin.

Kreppan tók seg upp, tí andstøðan hevði meirluta fyri misáliti á fleiri ráðharrar, eftir eina KT gølu í Svøríki, har viðkvæmar persónsupplýsingar kanska hava likið út,  tá KT-uppgávur  vórðu útveittar.