Rene Shaki Joensen til Ísland at spæla fótbólt

24 ára gamli miðvallarin, Rene Shaki Joensen, hevur seinastu mánaðirnar leitað eftir nýggjum felagi, eftir at hann gavst í danska felagnum, Vendsyssel.

Nú skal hann fyribils ikki leita meira, tí í dag hevur hann undirskrivað sáttmála við Grindavík, sum spælir í bestu deildini. Sáttmálin er galdandi í tríggjar mánaðir, sigur Rene Shaki Joensen við Kringvarpið.

Grindavík liggur í løtuni væl fyri í íslendsku kappingini. Felagið er á triðja plássi við 21 stigum. Seks stig eru upp til fyrsta plássi, har Valur er við 27 stigum.

Grindavík spælir í kvøld ímóti Víkingi, sum er á áttanda plássi.