Nógvar tómar sengur og fleiri í somu song um dagin

Nógvar sengur standa tómar á Suðuroyar sjúkrahúsi og Klaksvíkar sjúkrahúsi.

Leggingarprosentið var knappliga hálvthundrað í Suðuroynni í fjør, og til 1.juni í ár var tað 55,7.

Í Klaksvík var leggingarprosentið 72,1 í fjør og 81,2 til 1.juni í ár.

Tølini eru í svarinum hjá Sirið Stenberg, landsstýriskvinnu, til Elsebeth Mercedis Gunnleygsdóttur, løgtingskvinnu. 

Við fylgjarum, sum eru innlagdir, eru tølini eitt vet størri.

Yvir 200 prosent á Barnadeildini

Á Landssjúkrahúsinum eru nógvar innleggingar. Har var prosentið 102,6 í fjør, 195,3 á Barnadeildini.

Fyrra hálvár í ár var innleggingarprosentið 92 á Landssjúkrahúsinum, men tó 218,1 á Barnadeildini.

Talið í Havn fer upp um 100 prosent, tí roknað er bara við heilum seingjardøgum. 

Verður ein sjúklingur innlagdur um morgunin og útskrivaður aftur á middegi, so telur hetta sum ein seingjardagur. 

Verður ein annar sjúklingur lagdur í somu song eftir døgurða, telur tað fyri ein seingjardag afturat. 

Altso tveir dagar fyri somu song sama dagin.