Vil hava færri og ríkari ferðafólk til Grønlands

Í Grønlandi mælir ein nevndarlimur í Visit Greenland til, at færri ferðafólk koma til Grønlands.

Eftir hansara tykki kunnu færri ferðafólk leggja fleiri pengar eftir seg.

- Tað ræður bara um at tekkjast teimum ferðafólkunum, sum eru væl fyri fíggjarliga, sigur Erik Bjerregaard, sum eisini er hotelstjóri, við Sermitsiaq.

Floghavnir fyri 3,6 mia. kr.

Í Grønlandi fer politiska skipanin at gera íløgur í nýggjar flogbreytir fyri 3,6 milliardir krónur.

Tað er millum annað fyri at fáa fleiri ferðafólk til Grønlands.

Men nú talar Erik Bjerregaard at, tí hann heldur, at ferðavinnan í Grønlandi er ov illa skipað.

- Vit mugu kjakast um, hvat vit vilja við ferðavinnuni, sigur hann við blaðið.

- Vit mugu vita, hvørji ferðafólk, vit vilja hava, og hvussu nógvum, vit hava pláss fyri.

- Vit mugu vita, hvørjar tænastur, vit skulu veita teimum, við gistingarumstøðum, undirstøðukervi og heilsurøkt, sigur hann við Sermitsiaq.

Ferðamannaskip

Sum dømi vísir hann á, at smáu ferðaskipini við 200 ferðafólkum leggja fleiri pengar eftir seg, enn stóru ferðaskipini við 1000 ferðafólkum, sum eisini slíta náttúruna meiri.

- Vit eiga ikki at gera somu mistøk sum íslendingar, sigur Erik Bjerregaard, sum eisini er nevndarlimur í Visit Greenland.