Vinnan vil eisini hava bíligan avlopsstreym

Føroya arbeiðsgevarafelag tekur undir við, at tey, sum brúka grøna orku, sleppa bíligari. Men felagið vil eisini hava bíligari streym til vinnuna

Um náttina leypir streymur av hjá SEV. Hann kann seljast bíligari, heldur landsstýrið.

Høgni Djurhuus

18.10.2017 - 09:16

Vinnan eigur eisini at fáa bíligari streym, tá SEV hevur streym, sum leypir av, serliga um náttina.

Føroya arbeiðsgevarafelag hevur ummælt ætlaðu broytingina í elveitingarlógini.

Landsstýrið ætlar at loyva SEV at hava ein serligan prís fyri streym, sum verður brúktur til hitapumpur og til at løða el-bilar.

Ávirkar SEV

Hesin prísur kann í mesta lagi vera 40 oyru, 50 oyru við meirvirðisgjaldi, lægri enn hægsti prísurin hjá SEV.

Føroya arbeiðsgevarafelag tekur undir við hesum.

Men felagið heldur, at lógarheimildin eigur at verða víðkað, so SEV eisini sleppur at lækka prísin til privatu vinnuna, tá avlopsorka er tøk. Tað er hon serliga um náttina.

Arbeiðsgevarafelagið vísir eisini á, at uppskotið hjá landsstýrinum sigur ikki, hvussu tað fer at ávirka SEV fíggjarliga og streymprísin yvirhøvur at broyta lógina um elveiting.