Botnfiskurin hilnast heldur ikki væl í ár

Heldur ikki í ár fer føroyska feskfiskaveiðan at hilnast væl.

Tað skrivar Hagstovan, sum hevur kunngjørt fiskiskapin til 1.oktober.

Fyrstu tríggir ársfjórðingarnir í ár geva eina ábending um, at feskfiskaveiðan heldur ikki í ár fer at hilnast væl. 

Afturgongdin, sum hevur verið í avreiðingunum seinastu árini, heldur fram, skrivar Hagstovan.

Samanborið við 2016 eru 11 prosent minni av toski í ár, hýsan er nakað tað sama, men meira er av upsa, 14 prosent meira í ár. 

Nógv meira er fiskað av kongafiski, vøksturin er 1000 tons, heili 142 prosent.

Minni fæst fyri fiskin

Botnfiskurin er eisini ein minni inntøka hjá Føroyum, góðar 40 milliónir minni í ár enn somu tíð í fjør.

Prísurin er ikki so góður í ár. 

Sum dømi kann upsin nevnast. 14 prosent meira eru fiskað, men upsin er í ár er seldur fyri níggju prosent, 12,5 mió. kr., minni enn í fjør.

Botnfiskaveiðan er minkað nógv seinastu tíggju árini. Í 2008 var hon til 1.oktober góð 63.000 tons. Í ár er hon 39.500 tons. 
Í 2002 fór hon upp um 90.000 tons.