Føroysk skip hava harðari treytir enn útlendsk

Fiskivinnuráðið undrast á, at somu treytir eru ikki galdandi fyri føroysk skip og útlendsk skip, tá tey fiska í føroyskum sjógvi.

Ráðið vísir á, at sambært kunngerðini um fiskiskapin hjá skipum úr ES-londum, kunnu tey fiska upsa beinleiðis við troli, har meskarnir eru 120 millimetrar.

Kravið til føroysk skip er 135 millimetrar.

Ráðið tekur eisini fram kunngerðina um fiskiskapin hjá norskum skipum í føroyskum sjógvi.

Sambært henni skulu útlendsk skip hava skiljirist í trolinum frá 1.apríl í ár.

Føroysk skip skuldu hava hesi ristina longu 1.januar.

Millum trol og húk

Fiskivinnuráðið heldur, at tað er óheppið, at ikki ber til at flyta fiskidagar millum bólk tvey og bólk trý frá 1.oktober í ár.

Trolarar eru í bólki tvey, og tey stóru línuskipini eru í bólki trý.

Fiskivinnuráðið hevur viðgjørt kunngerðina um avhending av fiskidøgum.

Ráðið vísir á, at tað setir feløg í fiskivinnuni í eina torføra støðu, tí tey missa møguleikan at flyta dagar millum bólkar.

Feløgini hava lagað virksemið sítt eftir tí at kunna lata fiskidagar millum bólkarnar. Nú verður hetta broytt.

Fiskivinnuráðið heldur, at loyvt eigur at vera at flyta dagar millum húk og trol til árslok, tá kvoturnar koma í staðin fyri fiskidagarnar.