Nú eru lúsatølini almenn

Nú ber til hjá almenninginum at síggja, hvussu nógv lús er á alilaksinum í Føroyum.

Heilsufrøðiliga Starvsstovan hevur lagt lúsatølini út á heimasíðu sína, og har sæst, hvørji aliøki eru ringast rakt av lúsapláguni.

Poul Michelsen, landsstýrismaður í vinnumálum, hevur við kunngerð avgjørt, at úrslitini av lúsateljingunum skulu vera almenn. 

Tað er talið á vaksnari kvennlús í miðal á hvørjum laksi, sum er avgerandi. 

Kunngerðin um at tálma og yvirvaka lús á alifiski krevur, at talið skal ikki fara upp um hálva aðru vaksna kvennlús fyri hvønn fiskin.

Á yvirlitinum, sum nú er almannakunngjørt, sæst m.a., at í aliøkinum Fossá hjá Marine Harvest var hálvonnur vaksin kvennlús á hvørjum laksi tann 16. januar. Og 8. januar vóru tvær á hvørjum laksi hjá Bakkafrosti á Argjalandinum.

Heilsufrøðiliga Starvsstovan almannakunnger lúsatølini á undirsíðuni "Aling" og síðani "Lúsatøl" á heimasíðu stovnsins, og sum frálíður verða viðgerðir við heilivági eisini almannakunngjørdar har.

Sjúkutilburðir á aliøkjum verða eisini almannakunngjørdir so hvørt á høvuðssíðuni, hfs.fo