ES-tingið skal atkvøða um summartíð

Í morgin fer ES-tingið at atkvøða, um skipanin við summartíð skal takast av.

Atkvøðugreiðslan er ikki bindandi, men heldur ein roynd at fáa ES-nevndina at koma við einum uppskoti um at taka summartíðina av, so tað slepst undan at flyta klokkuna tvær ferðir um árið.

ES-fyriskipanin um summartíð hevur verið í gildi síðani 1981.

Finnlendingar hava roynt at fáa ríkisdagin at samtykkja ein lóg um at taka summartíðina av. 

70.000 undirskriftir vórðu savnaðar í heyst, men hóast stórur meiriluti var í ríkisdegnum fyri málinum, bar tað ikki til, tí Finnland sum ES-limur er bundið av fyriskipanini um summartíð.

70 lond í øllum heiminum hava summartíð, teirra millum eisini Føroyar.