Illgruni um dadlur sum geva livrabruna

Heilsufrøðiliga starvsstovan ávarar móti dadlum, sum kunnu elva til livrabruna, tí Hepatitis A virus kann vera í teimum.

RM Import A/S afturkallar dadlurnar, sum eita Juicy Dates dadler, og sum eisini eru seldar í Føroyum.

Dadlurnar eru í pakkum, sum viga 400 gramm netto.  

Serum-stovnurin í Danmark hevur staðfest fleiri tilburðir av Hepatitis A hjá fólki. 

Orsøkin tykist vera nevndu dadlur.  

Livrabruni

Um Hepatitis A virus er í dadlunum, er vandi fyri at fáa livrabruna. 

Sjúkutekin er fepur, spýggja, vaml, leyst lív, pína í vøddum og livrabruni. 

Seinni verða húðin og tað hvíta í eygunum gul.

Okkurt um fýra vikur ganga frá tí, at fólk hava etið dálkaðar dadlur, til sjúkutekin koma.

Nógvir føroyingar eru tó koppsettir fyri Hepatitis A í sambandi við ferðir uttanlands. 

Á heimasíðuni hfs.fo sæst nummarið á dadlupakkunum, sum kunnu vera dálkaðir.

Tey, sum hava hesar dadlur, kunnu antin lata tær aftur til handilin, har sum tær eru keyptar, ella beina tær burtur.