Ráðgevi hjá Trump mist trygdargóðkenning

Tað siga tveir ónevndir embætismenn sambært fronsku tíðindastovuni, AFP. 

Tað merkir, at Jared Kuschner, sum er giftur við dóttur Donald Trump, Ivanku, ikki sleppur at verða hjástaddur, tá forsetin hevur sína dagligu kunning.

Tað er har, amerikanskir loynidómar verða havdir á lofti.

Fyribils góðkenningin lækkað

CNN veit at siga, at Kuschner hevur ikki verið á dagligum kunningarfundi í Hvítu húsunum síðani í síðstu viku.

Jared Kuschner hevur seinasta árið havt eina fyribils trygdargóðkenning á hægsta stigi. Men nú er stigið lækkað.

Starvsfólkaovastin í Hvítu húsunum hevur givið boð um, at persónar, sum bara hava fyribils trygdargóðkenning, fáa ikki atgongd til størstu loynidómarnar.

Nú verður gitt, at Kuschner kanska fer at hava ein minni leiklut í framtiðini.

Illgruni um Kuschner

Men tað vísir advokatur hansara aftur. 

- Tað er ikki óvanligt, at tað tekur tíð at fáa eina varandi trygdargóðkenning í einari nýggjari umsiting, sigur hann.

Robert Mueller, sum kannar sambandið hjá teimum, ið løgdu valstríðið hjá Trump til rættis, við Russland, er eisini farin at kanna Jared Kuschner fyri ymisk altjóða sambond.

Illgruni er um, at Kuschner hevði loyniligar fundir við kinesarar í tíðini eftir forsetavalið, til Trump varð tikin í eið sum forseti.