Njósnari eitraður í Bretlandi

Tey skulu ígjárkvøldið hava fingið okkurt eiturevni í seg, sum enn ikki er eyðmerkt. 

Bretska løgreglan kannar hendingina, og sigur, at talan er ikki um yvirgang, og at eingin vandi er á ferð.

66 ára gmali Sergej Skripal og 33 ára gamla dóttir hansara, sum hann fylgdist við, eru bæði á sjúkrahúsi í Salisbury, og støðan er ring, skrivar BBC.

Friðskjól í Bretlandi

Skripal er pensjoneraður russiskur fregnartænastumaður.

Ein russiskur dómstólur dømdi hann í 2006 13 ára fongsulsrevsing fyri at hava njósnast fyri Bretland.

Hann varð latin leysur í 2010, tá Bretland og Russland býttu um fangar. Skripal fekk tá friðskjól í Bretlandi, skrivar BBC.

Óttaðist hevnd

Avvarðandi hjá Skripal hava greitt russisku deildini hjá BBC frá, at hann var bangin fyri, at russiska fregnartænastan fór at hevna seg inn á hann. 

Seinstu tvey árini er kona hansara, eldri bróður hansara og sonur hansara øll deyð, - og familjan heldur, at tey doyðu á gátuføran hátt.

Russland noktar fyri at hava nakað við hendingina ígjárkvøldið at gera.

Kann ávirka HM í fótbólti

Bretski uttanríkisráðharrin, Boris Johnson, ávarar Russland og sigur, at kann tað prógvast, at Russland hevur samband við hendingina í Salisbury, so verður tað torført at senda bretska umboðan til HM í fótbólti í Russlandi í summar. Tað verður í hvussu er ikki vanliga almenna umboðanin. 

Bretska landsliðið verður tó ikki ávirkað av hesum, segði Boris Johnson í bretska parlamentinum í dag.