- Framferðin hjá Atlantsflogi er burturvið

- Eg haldi, at tað er heilt burturvið, at eitt alment partafelag sum Atlantsflog skal taka kappingina upp við okkum í privatu vinnuni.

Tað sigur Tummas Justinussen, nevndarformaður á Hotel Hafnia, í samrøðu við Sosialin. 

Finst at ætlanini um at byggja hotell

Tummas Justinussen finst hvassliga at ætlanini hjá Atlantsflogi um at fara beinleiðis inn í hotellvirksemið.

- Tað svarar til, at felagið, sum rekur undirsjóvartunlarnar, fer undir bilasølu fyri at fáa fleiri bilar at koyra gjøgnum tunlarnar, sigur nevndarformaðurin í Hotel Hafnia.

Hann vísir á, at tey keypa eitt ótal av ferðaseðlum frá Atlantsflogi, men um Atlantsflog nú fer í kapping við tey á Hotel Hafnia, so slepst ikki uttan um, at tey noyðast at hugsa um, hvønn tey skulu samstarva við framyvir, sigur Tummas Justinussen. SAS er kappingarneyti hjá Atlantsflogi á Føroyarutuni.

Skilir ikki atfinningarnar

Niels Mortensen, formaður í Atlantsflogi svarar atfinningunum í dagsins blað. 

Hann sigur, at øll hava rópt eftir kapping í flogvinnuni, og tað hava tey fingið. Men nú kappingin verður á hotellmarknaðinum eisini, so skal Atlantsflog bindast niður, og tað skilir Niels Mortensen ikki, sigur hann altso við Sosialin í dag.

Málið umrøtt í løgtinginum

Hotell-verkætlanin hjá Atlantsflogi varð eisini umrødd í løgtinginum fyrrapartin.

M.a. segði Bjørt Samuelsen, tingkvinna, at henni hevði dámt at fingið eina váðameting av hesi íløguni, sum almenna flogfelagið fer at gera saman við pensjónsfelagnum, Lív.

Og Bill Justinussen úr Miðflokkinum segði, at tað er munur á einum almennum og privatum partafelagi, og hann spurdi, hvussu langt Atlantic Airways kann fara, áðrenn landsstýrið setir eitt mark fyri tað almenna flogfelagið. 

Aksel V. Johannesen, løgmaður tók síðani orðið og segði, at kappingarneytin SAS er eisini eitt alment flogfelag, sum í stóran stíl rekur hotellvirksemi