Trump ynskir Putin til lukku

Putin fekk 77 prosent av atkvøðunum, og kann tí halda fram sum forseti í seks ár aftrat.

Donald Trump sigur, at hann ætlar sær at hitta Vladimir Putin.

- Eg vænti, at vit hittast í næstum at viðgera vápnadubbingina, sum tamarhald ikki er á, men vit fara ongantíð at lata nakran koma í nánd av tí, sum vit hava, sigur amerikanski forsetin.

Trump og Putin viðgjørdu eisini støðuna í Ukraina og Sýria.

Báðir forsetarnir eru á einum máli um menna sambandið millum londini, serliga nú USA fær nýggjan uttanríkisráðharra, skrivar russiska tíðindastovan, Tass.

Í síðstu viku avgjørdi Donald Trump at koyra Rex Tillerson úr starvinum sum uttanríkisráðharra. Nýggjur uttanríkisráðharri verður Mike Pompeo, sum er fyrrverandi CIA-ovasti.