Íleggjari krevur Zuckerberg úr Facebook

Talan er um Scott Stringer, sum í sínum starvi sum fíggjarstjóri hjá New York umsitur íløgurnar hjá amerikanska stórbýnum. 

Tað er gølan, har privatar upplýsingar hjá 50 milliónunum brúkarum eru latnar Cambridge Analytica, sum fær Stringer at krevja broytingar í nevndini fyri Facebook.

Tað skrivar Financial Times. 

Sambært Scott Stringer er neyðugt, at Facebook fær ein óheftan nevndarformann og tríggjar nýggjar nevndarlimir við servitan um data og etikk. Tað er eitt neyðugt stig fyri at tryggja, at Facebook sum sosialur miðil virðir og tryggjar privatlívið hjá sínum brúkarum.

- Talan er um áttandu størstu fyritøku í heiminum, sum hevur tvær milliardir brúkarar. Fyritøkan arbeiðir í einum ongamannalandi, og hevur ikki handlað á slíkan hátt, ið ger fólk trygg og vís í, at teirra upplýsingar nú eisini eru vardar, sigur Scott Stringer við Financial Times.

Býurin New York, sum Stringer umboðar, eigur partabrøv í Facebook fyri útvið eina milliard dollarar, tað eru seks milliardir krónur.

Hetta er fyrstu ferð, at ein stórur íleggjari alment ynskir broytingar í nevndini í Facebook.