Facebook við nýggjum trygdarátøkum

Facebook stríðist nú av álvara fyri at bøta um umdømið hjá sær í kjalarvørrinum av, at ymiskar greiningarfyritøkur hava fingið hendur á fleiri upplýsingum hjá Facebook-brúkarum.

Fyrst var talan um 50 milliónir brúkarar, men nú er komið undan kavi, at talan ivaleyst er um minst 87 milliónir brúkarar. Tað skrivar DR. 

Facebook hevur tí almannakunngjørt 9 nýggj átøk, sum skulu gera tað lættari hjá facebook-brúkarum at verja seg fyri misnýtslu av upplýsingum. Tað skrivar Mike Schroepfer, sum hevur evstu tøkniliga ábyrgd á sosiala miðlinum, á almenna blogginum hjá Facebook. Á blogginum ber til at lesa um nágreiniligu átøkini, sum Facebook hevur sett í verk tær síðstu tvær vikurnar. 

Millum annað vísir Facebook nú á, hvussu brúkarar betur kunnu hava tamarhald á upplýsingum so sum sms og telefonuppringingar.  

Facebook sigur, at innsavningin av dátum, so sum sms og telefonuppringingar, er ein tænasta fyri brúkaran, tí Facebook við hesum upplýsingum kann finna útav, hvørji fólk, tú oftast hevur samband við og sostatt gera tað lættari at halda hetta sambandið. 

Men Facebook hevur kortini valt at kanna nærri, um hetta veruliga er ein tænasta.