Misálit móti spanska forsætisráðharranum samtykt

Hetta er fyrstu ferð, at misálit er samtykt í spanska parlamentinum síðani Spania gjørdist demokratist í 1975.

63 ára gamli Mariano Rajoy, noktaði undan atkvøðugreiðsluni at leggja frá sær, tí hann hevði álitið frá veljarunum, sum valdu hann í 2016. 

Tyngjandi mál

Sosialistaflokkurin setti mánadagin fram misálit móti forsetanum, eftir at 29 persónar, sum hava tætt tilknýti til flokkin hjá Rajoy, vórðu dømdir fyri umfatandi mutur og svik. 

Misálitið var til viðgerðar í parlamentinum í Madrid í gjár, og atkvøðugreiðslan var í dag.

Nýggi forsætisráðharrin eitur Pedro Sanchez, og er formaður í Sosialistaflokkinum. 

180 atkvøddu fyri

176 av teimum 350 parlamentslimunum skuldu atkvøða fyri misáltinum, fyri at tað skal verða samtykt, men Sosialistaflokkurin hevur bara 84 sessir í parlamentinum. 

Men Podemos-flokkurin og katalonskir og baskiskir tinglimir atkvøddu fyri misálitinum, - tilsamans 180 atkvøddu fyri, sostatt varð misálitið samtykt.

Pedro Sanchez, leiðari fyri sosialistaflokkin, verður fyribils forsætisráðharri. Hann hevur lovað, at val verður um fáar mánaðir, um misálitið verður samtykt. 

Tað er ikki ofta, at misálit verður reist í Spania. Síðani 1975, tá Spania fekk demokrati, hava trý misálit verið reist í spanska parlamentinum, - men tey eru øll fallin.