Jupiter á veg úr føroyska flotanum

Uppsjóvarskipið Jupiter er á veg úr føroyska flotanum.

Tað er felagið Varðin í Gøtu, sum eigur nótaskipið, og bæði Jupiter og eitt annað skip hjá felagnum, Høgiklettur, hava staðið á sølulista í rúma tíð.

Felagið hevði gjørt avtalu við eitt russiskt felag um at keypa Jupiter, og fíggingin var fingin til vega.

Men eitthvørt kom í vegin hjá russiska felagnum, annars hevði sølan verið avgreidd í farnu viku, upplýsir Jákup Jacobsen, stjóri í Varðanum.

Russiska felagið hevur biðið um eitt skotbrá, tí felagið hevur framvegis áhuga í skipinum, men hevur biðið Varðan bíða við søluni, til teirra viðurskifti eru fingin í rættlag.

Jákup Jacobsen sigur seg vænta, at tað tekur ikki langa tíð, til Jupiter verður seldur av landinum.

Sølan var so nær, at manningin fekk boð um, at teir mistu kjansin. Nú eru teir so farnir aftur til fiskiskap við Jupiter.

Jákup Jacobsen sigur, at viðurskiftini eru so ógreið, at felagið velur at binda um heilan fingur, og tí hevur felagið gjørt av at seta tvey av skipunum á sølulista. Tíðin fer so at vísa, hvussu viðurskiftini laga seg, sigur hann.

Varðin eigur fimm skip tilsamans, og verða tvey av teimum seld, so hevur felagið trý skip eftir, sigur Jákup Jacobsen, stjóri í Varðanum.