Statsadvokaturin stevnir Trump og familjuni

Statsadvokaturin í New York fer at stevna Trump-Grunnin, Donald Trump sjálvan og eisini børn hansara fyri "víðfevnd og støðug" lógarbrot.

BBC endurgevur Barbaru Underwood, statsákæra, fyri at siga, at Trump-grunnurin, sum er vælgerðargrunnur, hevur verið uppi í "ólógligari politiskari samskipan", sum hevði til endamáls at ávirka forsetavalið í 2016.

Endamálið við rættarmálinum er at upploysa grunnin, sigur statsákærin sambært BBC.

Í fráboðan sigur statsákærin, at Donald Trump ólógliga hevur givið grunni sínum boð um at lata sær stuðul við at brúka navni á grunninum og pening, sum grunnnurin hevði savnað saman.

Statsákærin vil vera við, at grunnurin rindaði fleiri 100.000 dollarar fyri at gera semjur í løgfrøðiligum trætumálum um hansara klubbar, umframt at 10.000 dollarar vórðu brúktir til at keypa málning av Trump, sum skuldi hanga í einum øðrum av hansara klubbum.

Málningakeypið er, sambært ákæranum, eitt dømi av í minsta lagi fimm handlum hjá Trump við seg sjálvan, og sum eru brot á skattalógina um almannagagnligar vælgerðargrunnar.

Donald Trump, forseti hevur svarað ákærunum aftur á twitter í gjár:

The sleazy New York Democrats, and their now disgraced (and run out of town) A.G. Eric Schneiderman, are doing everything they can to sue me on a foundation that took in $18,800,000 and gave out to charity more money than it took in, $19,200,000. I won’t settle this case!...

— Donald J. Trump (@realDonaldTrump) June 14, 2018

Hann skrivar, at "skitnir demokratar úr New York gera alt, teir eru mentir, fyri at rættarsøkja meg um ein grunn, sum hevur latið meira til vælgerandi endamál, enn grunnurin hevur fingið inn. Eg geri IKKI semju í hesum málinum!", skrivar Donald Trump forseti á twitter.

Í stevningini krevur statsadvokaturin, at bann verður sett fyri, at Donald Trump skal kunna vera stjóri í nøkrum almannagagnligum grunni í New York í 10 ár, og at børn hansara fáa líknandi bann sett, tó bara galdandi í eitt ár.