325.000 kr. býttar millum 11 umsóknir úr Útnorðri

Felagsgrunnurin Vestnordisk Hovedstadsfond Nuuk, Reykjavík, Tórshavn hevur latið 325.000 kr. í stuðli.

Høvuðsstaðargrunnurin fekk 22 umsóknir hesaferð. 11 teirra fáa pengar úr grunninum.

Stýrið í grunninum hevur júst havt fund í Havn.

Í stýrinum eru borgarstjórar og býráðslimir í Havn, Reykjavík og Nuuk, níggju fólk.

Borgarstjórar og býráðslimir

Fyri Havnina eru Annika Olsen, borgarstjóri, Gunvør Balle, varaborgarstjóri, og Heðin Mortensen, býráðslimur, í stýrinum í Høvuðsstaðargrunninum í Útnorðri.

Grunnurin letur stuðul, okkurt um 300.000 kr. um árið, til mentan, undirvísing og ítrótt. 

Endamálið hjá grunninum er at styrkja vitan og samstarv millum borgarar og politikarar í teimum trimum kommununum. 

Ognin í grunninum eru pengarnar, sum tær tríggjar høvuðsstaðarkommunurnar á hvørjum ári lata grunninum.

Næsti fundur hjá stýrinum verður í mai 2019 í Reykjavík.