Grønland vil hava sendifólk í Kina

Grønlendska landsstýrið ætlar eisini at hava eitt sendifólk í Kina.

Frammanundan hevur Grønland sendifólk í Brússel, Washington og Keypmannahavn. Í heyst letur Grønland upp sendistovu í Reykjavík.

Næsta stigið verður Kina, upplýsir landsstýriskvinnan í uttanríkismálum, Vivian Motzfeldt, fyri grønlendska kringvarpinum.

Endamálið er at styrkja handilssambandið við Kina.

Seinastu árini hava grønlendsk landsstýrisfólk fleiri ferðir verið í Kina, og við eini sendistovu verða betri møguleikar at tryggja størri útflutning til Kina, sigur Vivian Motzfeldt.

Danska sendistovan í Kina umboðar sum er Grønland, men tað er ikki nóg mikið, heldur Vivian Motzfeldt. 

- Sjálvandi skulu vit handla gjøgnum donsku sendistovuna, men Danmark hevur onnur áhugamál enn vit, sigur hon.