Landsstýrið umhugsar at skipa tvær tíðindadeildir

Tað stendur í ískoytispartinum til ólavsøkurøðuna hjá løgmanni.

Arbeitt verður við at tillaga kringvarpslógina, sum hevur virkað í trý ár.

Ein broyting verður helst, at smærri vinnurekandi skulu rinda lægri gjald.

Samstundis umhugsar landsstýrið at skipa tvær tíðindadeildir í Kringvarpinum fyri at fáa ein meira fjølbroyttan tíðindaflutning.

Uppskotið fall í februar

Í vetur skeyt Fólkaflokkurin upp at skipa tvær sjálvstøðugar tíðindadeildir í Kringvarpinum. Endamálið var at fáa størri fjølbroytni í tíðindaflutningin. Undirtøka var ikki fyri uppskotinum tá.

Men undir orðaskiftinum nam Rigmor Dam, landsstýriskvinna í mentamálum, við atfinningarsama orðaskiftið, sum ofta er í almenna rúminum um Kringvarpið.

- Meiningarkanningin um átrúnað, sum vísti stóran mun millum miðstaðarøkið øðrumegin og Eysturoy og Norðoyggjar hinumegin, hevði helst víst tað sama, um fólk vóru spurd um Kringvarpið, segði hon í løgtinginum undir fyrstu viðgerð tann 28. februar í ár.

Útvarp Føroya og Sjónvarp Føroya vóru løgd saman í ein stovn, Kringvarp Føroya, á heysti 2004. Stovnurin hevur virkað síðan 1. januar 2005.