Ikki tikið avgerð um stjórnarskipanina

Løgmaður ætlar at tosa við formenninar í flokkunum fyrst, áðrenn hann tekur støðu til, um hann leggur fram aftur uppskotið um stjórnarskipan.

Formaðurin í grein 25 nevndini hjá løgtinginum, sum viðgjørdi uppskotið í seinastu tingsetu tó uttan at skriva álit, heitti á løgmann um at leggja uppksotið fram aftur í hesi tingssetuni.

Stjórnarskipanararbeiðið fyllir skjótt 20 ár, og eg havi lagt stóra orku í málið alt valskeiðið, men tað hevur verið tungt, segði Aksel V. Johannesen, løgmaður, í tinginum í gjár.

Stjórnarskipanin er ikki eitt samgongumál. Hon er eitt mál fyri alt løgtingið og allar føroyingar, segði hann. 

Tí má alt løgtingið eisini vera við. 

Viljin hjá andstøðuni hevur verið avmarkaður, men eg fari kortini at tosa við formenninar eina ferð enn fyri at vita, um grundarlag er fyri at arbeiða víðari við stjórnarskipanini, segði løgmaður.