Talið av kinesarum í Grønlandi veksur

Tað er serliga tørvurin á støðugari arbeiðsmegi á fiskavirkjum, eitt nú hjá Royal Greenland, sum er orsøkin til stóra vøksturin av kinesarum í Grønlandi.

Blaðið Sermitsiaq vísir til tøl frá grønlendsku hagstovuni, sum siga, at tað 1. juli í ár búðu 65 kinesarar í Grønlandi. Um somu tíð í fjør búðu 35 kinesarar í Grønlandi. Árini frá 2011 til 2016 var talið millum tíggju og 15.

Sermitsiaq hevur eitt yvirlit yvir útlendingar frá grønlendsku hagstovuni, sum tó ikki fevnir um danir og føroyingar, men hetta yvirlitið sigur, at tað eru fólk úr Filipinunum, sum er best umboðað í Grønlandi. Tey eru 238 í tali. 161 fólk úr Teilandi búgva í Grønlandi, 136 íslendingar, 82 sviar og so 65 kinesarar, 59 norðmenn og 47 týskarar.

Og hesi tølini eru altso frá 1. juli 2018.