Fólkatalið á Eiði methøgt

Ongantíð fyrr hava búð so nógv fólk á Eiði sum ídag. Sambært Eiðis Kommunu búgva nú 726 fólk í kommununi, og tað er met.

Áðrenn kreppuna fyrst í nítiárunum búðu 721 fólk á Eiði, men eftir kreppuna minkaði íbúgvaratalið niður í 635.

Í 2003 kom fólkatalið upp aftur á sama støði sum áðrenn kreppuna, 723 borgarar, men eisini tá kom eitt fall í fólkatalinum, sum rakti botnin í 2012, tá bert 666 fólk búðu í Eiðis kommunu.

Síðani tá eru 60 fólk løgd afturat, og íbúgvaratalið er nú 726.

Tað eru 14 fólk fleiri enn 1. juni, sum eru nýggjastu tølini hjá Hagstovuni.

Sambært Jógvani í Skorini, borgarstjóra, fær kommunan regluliga fyrispurningar um bústaðarmøguleikar í kommununi, og sambært borgarstjóranum hevur Eiðis Kommuna ætlanir um at bjóða fleiri grundøki næsta ár.