Løgtingsfundir útsettir

Løgtingsfundirnir, sum skuldu vera hósdagin og fríggjadagin, eru tiknir av skránni.

Løgtingsfundur verður ístaðin seinnapartin 10. september.

Páll á Reynatúgvu, løgtingsformaður, sigur, at løgmaður bað um, at fundirnir nú í vikuni blivu fluttir, tí landsstýrið skal hava seminar.

Í næstu viku hevur Útnorðurráðið ársfund i Føroyum, og eftir tað er fundur í Norðurlandaráðnum.

Tingið fer at viðgera uppskotið hjá landsstýrinum um varskógvaraskipan tann 10. september og uppskotið hjá andstøðuni um tunlar norður um Fjall í Borðoynni.

Í gjár segði samgongutingmaðurin, Jónleif Johannesen, at hann vil hava, at samgongan semist um at framskunda hesar tunlarnar, og at hann vónar, at tann semjan kann gerast, áðrenn tingið kemur saman aftur.