Eina millión til nýtt graslíki í Djúpumýru

Peningurin verður tikin av íløgujáttanini til ítróttarøkið. 

Ætlanin var at skifta graslíkið í summar, men tað var av ongum.

Nú er avrátt, í samráð við leiðsluna í KÍ, at skifta graslíkið beinan vegin, tá landskappingin er av. Sostatt skal alt fyrireikingararbeiðið gerast fyri 27. oktober, verður sagt í tilráðingini til býráðsfundin.

Ætlanin er eisini at seta nýggjar ljósmastrar upp við vøllin, men tað verður ikki gjørt nú.

Hinvegin hevur skund at leggja upp fyri ljóskrøvunum, sum Fótbóltssambandið hevur sett, og tí má betongfundament gerast, samstundis sum vøllurin verður skiftur, stendur í tilráðingini.

Hetta arbeiðið verður mett at kosta eina millión krónur. 

Klaksvíkar býráð samtykti fyri summarfrítíðina at taka av lægsta tilboði um nýtt graslíki, og løtuni verður arbeitt við at fáa fyritøkuna Polytan at skifta vøllin í oktober.