180 milliónir fyri at rudda í Grønlandi

Kristian Jensen, fíggjarmálaráðharri í Danmark, legði í gjár fram fíggjarlógaruppskot fyri komandi ár. 

180 milliónir krónur eru settar av til at rudda upp eftir hernaðarligt amerikanskt virksemi í Grønlandi.

Hetta er liður í einari avtalu, sum grønlendska landsstýrið og danska umhvørvismálaráðið gjørdu í januar.

Eisini er 1,1 millión sett av til kunningarátak viðvíkjandi faðirleysum grønlendarum og rættindum teirra umframt viðgerðartilboð til faðirleys børn. Frá 2020 verða 900.000 krónur settar av árliga til endamálið.

Danski staturin brúkar harumframt 576,2 milliónir krónur til 31 málsøki, ið danir hava ábyrgdina av í Grønlandi.

Blokkurin úr Danmark til Grønland komandi ár er 3 milliardir og 857 milliónir krónur, skrivar KNR.